Karina Fuglestein på snart 10 år, og Lisa Alexandra Jarli på snart 11
På tv-aksjonens stasjon i NMS-bygget, strøymde det på av glade bøsseberarar og fulle bøsser. Mange syntest det var kjekt å gå ein søndagstur til nytte for andre.
- Vi som bur i Noreg og har det så godt – dette er det minste vi kan gjere! meiner Anne Gine Weberg. Ho har ei dotter i Kampen skolekorps og hadde fått spørsmål om ho kunne tenke seg å stille som bøsseberar.
- Skulle berre mangle. Og søndagstur går vi jo uansett, smiler Weberg. Ho fortel at utan unnatak var alle ho ringde på hos, positive til aksjonen.
- Fleire eldre sa også at dei hadde venta på oss, seier Weberg.
- Berre kjekt!
Karina Fuglestein på snart 10 år og Lisa Alexandra Jarli på snart 11 var to andre entusiastiske bøsseberarar. Dei hadde gått saman med vaksne tidlegare år.
- Vi ville gå åleine i år, vi tenkte at det ville bli kjekt.
- Og det var det?
- Ja, det var ikkje skummelt, det var berre kjekt. Det var nokon som sa at det ikkje passa, men dei fleste ville gi. Det var dessutan mange som syntest holet i bøssa var for lite! Dei stressa litt med å få ned myntane.
- Kor mykje ga folk, då?
- Det varierte ein del, men det vart mykje 100-lappar og 200-lappar, seier dei to blide bøsseberarane.
På stasjonen i NMS-bygget var det Signe Sirevaag Thorsen og Per Inge Torkelsen som heldt kontrollen over bøsser, bøsseberarar, ruter og kart. På kjøkkenet hadde Elin Larsen steppa inn i kjøkkenteneste, og sytte for varme pølser, kake, kaffi, brus og godteri til bøsseberarane etterkvart som dei kom inn. I alt var det fire stasjonar i bydelen, på Stokka, Kampen, Våland og Eiganes.
- Vi har 35 bøsser ute frå denne stasjonen, men ein del går fleire i lag. Kampen skolekorps stilte med om lag 10 bøsseberarar, og elles er det folk frå menigheiter og enkeltpersonar, fortel Sirevaag Thorsen. I likskap med Per Inge Torkelsen er ho med på organiseringa av TV-aksjonen, sidan ho sit i Eiganes og Våland bydelsutvalg. Torkelsen synest det er berre flott å vere med:
- Det er jo fort gjort! Og folk er så positive at jobben vår blir veldig lystbetont, seier Torkelsen.
Redaktør -