På bydelsutvalsmøtet for Eiganes og Våland 26. september, var Trafikksikkerhetsplan for Stavanger 2005-2008 ei av sakene som var oppe.
Planen er meint som ein reiskap for å synleggjere behova og prioriteringane innan trafikksikkerheit i Stavanger kommune. Planen representerer både fysiske tiltak og åtferdstiltak; hovudfokuset er trafikantåtferd og nullvisjonen – visjonen om ingen drepne eller varig skadde i trafikken. I planen finst det mellom anna ein analyse av ulukkessituasjonen i Stavanger. Eit vesentleg punkt er balansegangen mellom sikkerheit og framkomelegheit – og ei betre prioritering mellom desse.
Mange av utvalsmedlemmene fremja imidlertid framlegg, anten som framlegg til vedtak – eller som oversendingsframlegg. Rigmor H. Amundsens (Krf) framlegg vart samrøystes vedteke. I framlegget vart det slått fast at dagens hovudvegsystem ikkje er tilstrekkeleg. Det vart også peika på at småvegane i bustadområda vert meir belasta og at dette medfører auka fare for ulukker, samt at dagens hovudvegar er ei miljøbelastning for dei omliggande bustadområda. Til slutt heiter det at : ”Bydelsutvalet ber difor om at det prioriterast alternative hovudvegar som vert lagt under jorda”.
I tillegg til dette framlegget til vedtak, kom fleire med framlegg til oversending, desse var altså ikkje oppe til avrøysting.
Egil Songe-Møller (SV) fremja eit oversendingsframlegg med fire punkt. Det første gjekk på krysset Wesselsgt/Madlaveien og situasjonen her. I det andre punktet vert det foreslått at St. Svithuns gate frå Wesselsgate til Løkkeveien vurderast stengt for gjennomkøyring. I dei to siste punkta hadde Songe-Møller ulike framlegg til tiltak om sikrare ferdsel i trafikken.
Dessutan fremja Knut Redalen (Ap) framlegg om å vurdere merking av ulukkespunkt og ulukkesstrekningar, og Per Inge Torkelsen (V) fremja framlegg om at syklistar og kollektivtrafikken skal prioriterast høgare. Torkelsen fremja også framlegg om at deler av Eiganesveien bør opparbeidast med sykkelsti.
Redaktør -