Solveig Helliesen synest det er godt å få hjelp til luking i hagen. Ho er ein av fleire som bruker Småjobbsentralen flittig. Morten Bendiksen, framme, synest jobben er kjekk og synest det er kjekt å tene litt pengar.
Småjobbsentralen i Klepp kommune har vist seg å vere liv laga, og får stadig fleire oppdrag. Ikkje så rart kanskje, når sentralen tilbyr alt i frå luking og barnepass til sølvpuss og nisseoppdrag på julaftan.
- Eg klarer ikkje luke lenger, så det er veldig godt å få desse ungdommane heim så dei kan hjelpe meg, seier Solveig Helliesen.
Ho er plaga med hoftene, og klarer ikkje bøye seg ned til beda lenger. Då er det godt at Morten Bendiksen kunne stille opp i dag. Ho følger han ut i hagen for å gi han instruksjonar om kva ho vil ha gjort. Morten skal byrje på baksida av huset i dag, og i gong med kyndige hender. Han viser seg å vere ein rask og nøyaktig lukar.
- Kva synest du om prisen – 60 kroner timen?
- Eg synest det er altfor lite, og gir gjerne litt ekstra, seier Solveig.
Halvvegs i lukinga ropar Solveig til Morten:
- Eg må få nummeret ditt, så kan eg ringe deg om fleire jobbar seinare.
Morten Bendiksen har vore tilknytt Småjobbsentralen i Klepp i om lag ein månad, og trivst veldig godt med jobben.
- Det er gøy å ha noko å gjere i staden for berre å sitje heime, og eg likar arbeidet godt. Og så tener jo eg pengar på det også. Mor synest òg det er bra at eg gjer noko fornuftig, seier Morten.
I neste veke tek han til på ”mekanisk” ved Time videregåande skole. Han vil likevel halde fram med å ta oppdrag for Småjobbsentralen.
- Eg får tilbakemeldingar frå kundane på jobbane eg utfører, og har ikkje motteke klager hittil, fortel Morten.
Småjobbsentralen starta opp våren 2004, og er eit treårig førebyggingsprosjekt for ungdom mellom 14 og 17 år. Prosjektet er støtta av Rådet for Psykisk helse, og Helse og Rehabilitering. Eitt av måla er at småjobbane skal gi positive ringverknader der ungdommane får meistre nye utfordringar samtidig som dei tener pengar på det.
- Men vel så viktig er det å prøve å fylle dagen med noko meiningsfullt. Vi rettar oss gjerne til dei som frå før ikkje er aktive i lag og organisasjonar i kommunen, seier Mai Ragnhild Svendsen, prosjektleiar ved Småjobbsentralen i Klepp kommune.
25 ungdommar er tilknytt sentralen. Dei tek mange slag oppdrag, og for alle aldersgrupper.
- Me ser at ungdommane blomstrar opp. Dei tør prøve nye utfordringar, og vert flinkare og flinkare. Mange får også eit større kontaktnett, og venner på tvers av generasjonane, fortel Svendsen.
Redaktør -