Marianne Kåstad (til venstre) og Camilla Ystanes i Fantefølge har funne seg godt til rette i tronge Kjellerteateret i Storstova. Mennene Bård Ystanes og Kurt Kåstad snikrar amfi i staden for scene.
Teatergruppa Fantefølge har spelt klassikaren «Reisen til julestjernen» for fulle hus i Storstova på Bryne dei to siste åra. No går dei i ei heilt anna retning med «Edel har fest» - eit sterkt drama med to karakterar og publikum ein meter unna.
Det kjennest tett og lite, Kjellerteateret i Storstova. Jo, dette lokalet må vera godt eigna til intimteater, er den første tanken som slår ein når ein entrar rommet. Med 35 i salen vil det kjennast endå tettare. Og med aggressivt drama og sterke kjensler frå skodespelarane Else Strøm Larsen og Brigt Skrettingland ligg alt til rette for at einaktaren «Edel har fest» kan krype under huda på publikum.
-Det blir ein intens time der det svingar frå dei store kjenslene til dei heilt nære. Det er ein kjenslemessig berg- og dalbane, lovar regissør Camilla Ystanes.
Intimt og avslørande
Einaktaren handlar om den einsame kassedama Edel som har invitert veninner til fest, men i staden for veninnene dukkar bråkjekke Ruben opp og forsyner seg av whiskyflaska. Møtet mellom dei to blir ein konfrontasjon som tvingar begge til å utlevere seg sjølv.
-Dette er eit tett og intimt drama som ikkje kan spelast på ei stor scene i ein stor sal. Dei to skodespelarane har jobba mykje med å skape gode og truverdige karakterar, og det har vore krevande sidan dei er veldig ulike karakterane dei skal gestalte. Spelet må vera levande og organisk. Intimteater er avslørande. Publikum ser alle detaljar i spelet, seier Camilla Ystanes.
-Men me er i rute. Dei to har øvd 4-5 kveldar i veka no i slutten. Det har vore ein veldig spennande måte å jobbe på, legg ho til.
Scenaografien i Kjellerteateret er også litt spesiell til premiera på «Edel har fest». I staden for å bygge opp scena, har Ystanes flytta spelet ned på golvet og løfta publikum i staden. Eit lite amfi er bygd i det tette rommet.
100 på kurs
Gruppa Fantefølge med «Edel har fest» opp sin tredje produksjon. Dei to første har vore to rundar med «Reisen til julestjernen» - med både barn og vaksne på scena. Fantefølge skal også vera eit teater med plass til både barn og vaksne.
-Formålet vårt er todelt. Me skal ha kurs i drama og dans for barn, og me skal produsere og spele teater med og for vaksne, fortel Camilla Ystanes og Marianne Kåstad.
I vår har 100 ungar vore opptekne med danse- og dramakurs i Fantefølge sin regi.
-Det er stor etterspurnad etter slike kurs. Me har hatt fire teaterfantgrupper, to dansefantgrupper og to prinsesseballettgrupper for dei minste gåande i vår, seier Marianne Kåstad.
Opera og bruredans
Fantefølge har også planane klare for nye teatersatsingar for vaksne. Seinare i år startar øvingane til folkekomedien «Bruredansen» av Norvald Tveit – ein god, gammal buskis med dans på brygga og alt som høyrer til av kjærleik og intrigar. Planane er også klare for eit opera-prosjekt, men det er ikkje sett noko nærare tidspunkt for kva tid det skal presenterast for publikum. Men først skal altså «Edel har fest» visast til jærbuen. Det er sett opp sju framsyningar, men stykket skal også testast på publikum heile fire gonger før premiera.
-Me skal spela tre framsyningar for skuleklassar på ungdomstrinnet og vidaregåande. Me også opp ein førpremiere på Unge Spor sin teaterfestival. Det er nyttig å teste ut det intense dramaet før me inviterer jærbuen til å kome og sjå, meiner Camilla Ystanes.
Redaktør -